Kaendahane merapi ing wayah sore

Angin sore kang tumiyup santer

Mbarengi keplasing panyawang

Kaya jemparing linepas saka tali gendhewa

Dumandakan kandheg jegreg ing sikile merapi

Nggelar panyawang

Njembarake pangerten

Ngresepi kaendahan

Manuk-manuk pathing cecirit pathing bleber

Bali mulih mring susuhe

Pak tani lan mbok tani

Mlaku bareng nurut galeng

Kaya-kaya lagi ngetung jembare sawahe

Kaya-kaya lagi ngetung asile panene

Apa sedheng kanggo mangan anak bojo

Angin sore kang sumilir

Nggeremet ereng-ereng gunung merapi

Nggeremet suket-suket ing sunggene bocah ngarit

Ngarasake ambune suket

Ngarasake ambune kringet

Kang tumetes sajroning darma bekti

Mring ibu lan bapa

Mring nusa lan bangsa

Mring kamanungsan lan lestarine alam

Angine sore saya wani

Nrabasa alang-alang

Nrabasa alas gung liwang-liwung

Genteyongna karo kethek lan lutung-lutung

Gegojegan karo macan kumbang

Angin sore krekel-krekel

Munggah pereng-pereng kang saya angel

Watu-watu lan padhas-padhas pating jenggeleng

Ing saben wektu bisa gemblundhung

Katerak mbludhage lahar merapi

Kaendahane gunung merapi wayah sore

Jebul kebak cerita kang ngedheg-dhegi

Tandha pitakon

Kanggo urip sabanjure

Kaendahane merapi ing wayah sore

Ing pucukmu aku rumangsa

Urip iki mung nyuwun welas asihe gusti

Ngarep-ngarep peparing lan pangayoman

Saya yen srengenge ing sisih kulon kae saya gumelar

Aku saya rumangsa kijenan

Ora ana kang dakjaluki pitulung

Kajaba gusti kang murbeng dumadi

Kang tansah mitulungi kawulane kang bekti

Kaendahan merapi ing wayah sore

Ora mung panyawang kang katon saka kadohan

Nanging ing pitutur ngenani

Parjuwangan urip

Kanggo lestarine alam lan panguripan

Lan pasrahing dhiri ikhlas tumusing ati

Sajroning donga, dzikir

Panyuwun, lan puji syukur.

Dening: Sutardi MS Diharjo, Klaten Selatan